Ginkakibot sang isa ka entrepreneur nga si Aman Birendra Jaiswal sang madiskubre niya nga ang isa ka delivery rider sang Ola Foods ginkaon ang iya gin-order nga pagkaon.
Si Aman isa ka residente sang Noida, isa ka planned city nga nahamtang sa Northern State sang Uttar Pradesh, India.
Ang delivery rider konektado sa Ola Cabs, nga partner sang Ola Foods.
Suno kay Aman, antes pa magluntad ang insidente, nangayo anay ang delivery rider sang dugang nga 10 rupees (PHP6.56) agud idul-ong lang ang iya pagkaon.
Sa una, ginbawi ni Aman ang demand sang driver bangud wala sang patakaran ang Ola Cabs nga nagapahanugot sa mga delivery ridernga mangayo pa sang ekstra.
Apang, nagpasugot man siya sang ulihi, bisan pa nga subra ang ginpangayo sang driver nga delivery charge nga iya nabayran sa Ola Foods.
Samtang, ginpahulat pa siya sang delivery rider sang 45 minutos. Sang nagsiling ang driver nga yara na siya sa parking area, nakibot si Aman kag nagkadto siya sa lugar agud kuhaon ang iya order.
Nagapungko ang amo nga delivery rider sang ginakaon ang iya order nga pagkaon, kag upod man sini ang isa pa ka delivery rider, nga daw kaangay wala ini sang labot sa sitwasyon.
Sa karon, palamangkutanon pa kun ano ang posible mangin penalidad sa nasambit nga driver bangud sa pagkaon sang order sang iya nga kliyente.
