Nagpanindugan si Philippine National Police (PNP) chief Gen. Melencio Nartatez Jr. nga wala sang special treatment nga ihatag kay Senador Ronald dela Rosa sa tunga sang warrant of arrest nga ginpagwa sang International Criminal Court.
Ginhimo sang PNP chief ang pahayag subong nga Miyerkules, Mayo 27, bangud sa kabalaka nga posible nga mangin “malumo” ang pila ka mga opisyal sa anay hepe sang Philippine National Police bangud sang iya malawig nga relasyon sa organisasyon.
Gin-athag ni Nartatez nga bisan padayon ang respeto sang institusyon kay dela Rosa bilang anay PNP chief, ginpasiguro niya sa publiko nga wala gid sang espesyal nga pagtratar nga ihatag sa senador.
Suno kay Nartatez, ipatuman sang ila mga katapo ang tanan nga lehitimo nga direktiba sa propesyonal, patas kag transparent nga pamaagi.
Ginpahayag man sini nga ginalauman nga sundon sang tanan nga PNP officers ang standard operating procedures nga wala sang kahadlok ukon pagpabor sa bisan kay sin-o.
Madumduman nga nagserbi si Senador Bato bilang PNP chief sa idalom sang administrasyon ni Rodrigo Duterte halin 2016 tubtob 2018.
