Ginpaandaman sang Bureau of Animal Industry (BAI) ang mga nagahupot kag naganegosyo sang kanding kag karnero sa pungsod bangud sa paglapta sang balatian nga Peste des Petits Ruminants (PPR) sa Southeast Asia.
Suno sa BAI, ang PPR ang isa ka makalalaton nga balatian sa kanding kag karnero nga nagatuga sang lagnat, sip-on, mouth lesions, pneumonia kag tuman nga paghigko, nga masami nagaresulta sa pagkapatay sang sapat.
Apisar nga indi ini makalalaton sa tawo kag nagapabilin nga PPR-free ang Pilipinas, ginsiling sang Department of Agriculture (DA) nga mataas ang peligro sang pagsulod sang balatian bangud sa ilegal nga paghulag sang sapat, unsafe trade practices kag kontaminado nga kagamitan.
Gina-abisuhan ang publiko nga umiwas sa pagbakal ukon pagbiyahe sang kanding, karnero ukon produkto halin sa mga kapungsuran nga may PPR. Ginaganyat man ang mga mangunguma nga pabaskugon ang biosecurity sa ila nga mga farm kag gilayon nga i-report sa local veterinary offices ang mga sapat nga may sintomas kaangay sang lagnat, mouth sores, watery eyes, nabudlayan sa pagginhawa ukon gulpi nga napatay.
Ginsigurado sang DA-BAI nga padayon ang hugot nga monitoring, surveillance kag border control, kaupod ang World Organization for Animal Health, agud maproteheran ang industriya sang ruminants sa pungsod.
