Gin-umpisahan na subong nga Lunes, Hunyo 16, sang Department of Education (DepEd) ang School Year 2025-2026 sa pagbukas sang klase sang milyun-milyo nga mga estudyante, kadungan sang pilot implementation sang bag-o nga curriculum para sa Senior High School (SHS) sa masobra 800 ka mga buluthuan sa pungsod.
Sa bag-o nga curriculum, ang core subjects nabuhinan halin sa 15 padulong sa 5 nga may mga subjects nga: Effective Communication, Life and Career Skills, General Mathematics, General Science, kag Pag-aaral ng Kasaysayan at Lipunang Pilipino.
Ang mga subjects ang igatudlo na subong sa sulod sang duha ka semestre agud mas mapasangkad ang pagkatuto sang mga estudyante kag buhinan ang mga academic workload sang mga ini.
Nahibaluan nga ginpili ang 841 nga mga pampubliko kag pribado nga mga buluthuan base sa ila sini nga mga kinaagman nga magpatuman sang programa. Tinutuyo sang DepEd nga mas mangin preparado ang mga estudyante para sa kolehiyo kag trabaho.
Subong man, nagpahayag sang pagkabalaka si Rizal High School Principal Richard Santos sa posible epekto sa mga manunudlo kag pasilidad inkaso nga ipatuman ini sa ila. Suno sa iya, posible nga maapektuhan ang teaching load sang mga manunudlo kag magtuga ini sang double shifting sa klase.
Nagpaguha man sang pahayag ang Teachers’ Dignity Coalition nga kulang ang suporta sa mga buluthuan nga kalakip sa pilot implementation, kasubong sang kakulangan sa mga classroom, learning materials, kag mga libro. Nagpanawagan man ang National Union of Students of the Philippines sang dugang nga pondo para sa edukasyon.
Samtang, gin-anunsyo ni Education Secretary Sonny Angara nga ang pagbukas sang 20,000 ka mga teaching positions subong nga tuig agud mapasangkad ang kalidad sang edukasyon kag mabuhinan ang kadakuon sang klase.
