Ginakonsiderar sang Department of Education (DepEd) ang pagpatuman sang trimester system para sa palaabuton nga school year 2026-2027 bilang kabahin sang “holistic approach” para sa mga estudyante.
Suno kay DepEd Secretary Sonny Angara, tinutuyo sang sistema nga makaangkon sang mas malawig kag mas tayuyon nga pagtudlo, husto nga pacing sang mga leksyon, kag mas manubo nga administrative burden para sa mga manunudlo.
Sa idalom sang sistema sang trimester, ang 201 ka adlaw sang pag-eskwela pagatungaon sa tatlo ka termino, nga ang una nga termino magasugod sa Hunyo tubtob Setyembre; ang ikaduha nga termino: Septyembre tubtob Disyembre; kag ang ikatlo nga termino: Enero tubtob Marso.
Ang kada termino may 54 tubtob 61 ka adlaw nga instruksyon, nga may magagmay nga mga pahuway para sa mga non-academic activities kag enrichment blocks.
Suno sa DepEd, magapagwa sila sang mga policy guidelines sa trimester calendar sa masunod nga mga inadlaw matapos ang pagkonsulta sa mga stakeholders.
Sa amo man nga tion, ginaduso man sang DepEd ang “low-disruption alternatives,” sa diin ang mga selebrasyon kag pag-obserbar sang eskwelahan mahimo nga ma-integrate sa aktwal nga outputs sang klase agud malikawan ang disruption sa pagtudlo.
