Ginpahanumdom sang Department of Education (DepEd) ang mga manunudlo kag iban pa nga personnel nga padayon nga magpakita sang propesyonalismo kag husto nga pamatasan sa paggamit sang social media.
Sa memorandum nga ginpagwa sang ahensya sang Agosto 11, ginpahayag sang DepEd nga indi buot silingon nga tungod pribado ukon naka-private ang social media account sang isa ka manunudlo, indi na ini sakop sang mga propesyonal kag ethical nga basehan sang ahensya.
Partikular nga ginpahanumdom ang mga post nga may kaangtanan sa mga estudyante, classroom activities, school premises, kag opisyal nga katungdanan sang mga manunudlo.
Suno sa DepEd, nakabaton ini sang mga report parte sa social media posts sang pila ka manunudlo kag school personnel nga wala nagasunod sa mga guidelines sang ahensya.
Ginpahanumdoman man ang mga manunudlo nga maghalong sa pag-post sang mga content nga may kaangtanan sa ila mga estudyante, bangud mahimo ini makaimpluwensya sa mga kabataan.
Ginpaandaman man ang mga empleyado sang DepEd nga likawan ang pag-post sang personal nga pag-atake batok sa ila mga kaupdanan ukon mga butang nga mahimo makasamad sa reputasyon sang ahensya.
Dapat man likawan ang pagpalapta sang sayop ukon indi matuod nga impormasyon online.
Bisan pa nga ginakilala sang DepEd ang paggamit sang social media bilang paagi sa pagdiskusyon sang mga napapanahon nga isyu, indi ini dapat gamiton ang mga estudyante, lakip na sa ila mga aktibidad sa paghimo sang content, sa paagi nga mahimo sila maeksponer sa pagpangyubit, harassment, ukon sobra nga public scrutiny.
