Nagpanawagan ang Department of Education ukon Deped sang mas hugot nga pagbantay sa paggamit sang social media sang mga kabataan matapos ang pagpangluthang sa Banga National High School sa South Cotabato.
Suno kay Education Secretary Sonny Angara, nalipay ang ahensya sa madasig nga aksyon sang Department of Information and Communications Technology ukon DICT batok sa mga online platform nga posible ginagamit sa pagrecruit kag pag-impluwensya sa mga menor de edad nga maghimo sang karahasan.
Bangod sini, nagsugot na ang Reddit kag Discord nga magtukod sang ila mga opisina sa Pilipinas matapos hatagan sila sang 24 oras nga palugit sang Cybercrime Investigation and Coordinating Center ukon CICC.
Ang katuyuan sini amo ang pagpasangkad sang koordinasyon sang mga online platform kag mga awtoridad sa pag-atubang sang cybercrime kag iban pa nga peligro sa internet.
Ginpabutyag ni Angara ang importante nga papel sang mga ginikanan sa pagbantay sa paggamit sang internet sang ila mga kabataan agod malikawan nga maimpluwensyahan sila sang mga grupo nga nagarecruit sang karahasan.
Ginsambit man sang kalihim ang pila ka pungsod nga nagahugot sang paggamit sang social media sang mga kabataan nga wala pa mag-15 ukon 16 years old.
Gin-insistir ni Angara nga dapat masiguro ang kaluwasan sang mga estudyante indi lang sa sulod sang eskwelahan kundi pati man sa mga digital platform.
Madumduman nga may pila na ka insidente sang karahasan sa mga eskwelahan sini nga tuig, kag ang iban sini ginakonekta sa paggamit sang internet.
