-- ADVERTISEMENT --

Ginhangkat sang House prosecutor panel kag Manila 3rd District Rep. Joel Chua ang kampo ni Vice President Sara Duterte agud itutok ang ila depensa sa pagsabat sa mga alegasyon sang undeclared wealth, sa baylo nga magpresentar sang mga dokumento nga nagapamatuod sang iya business registration.

Ini antes ang pagpadayon sang impeachment trial sa Senado buwas nga adlaw, Nobyembre 19, sa diin natalana nga magapresentar ang Defense sang apat ka testigo sa duha ka adlaw nga hearing.

Suno kay Chua, wala ginakwestyon sang prosekusyon ang rehistrosang Cale88 Foods Corporation sa Department of Trade and Industry (DTI), ukon ang rehistro sa Food and Drug Administration (FDA) sang banana chips product sang kompaniya.

Ginpanindugan sang mamalidha, indi ini ang nagapanguna nga isyu sa impeachment trial bangud kinahanglan pa sabton sang Defense ang mga alegasyon angot sa ginatos ka milyon ka pesos nga ginpahayag wala gindeklarar sa manggad sang bise presidente kag sang iya asawa nga si Manases Carpio.

Ginmensyonar man ni Chua ang testimonya sang ila expert witness nga si Atty. Alex Cabrera, nga gin-alegar nagbuyagyag sang masobra P800 million nga undeclared income nga ginapatungod sa bise presidente.

-- ADVERTISEMENT --

Ginhatagan pagtamod sang kongresista nga indi dapat maglihis ang hearing sa mayor nga alegasyon nga dapat sabton sang kampo ni Duterte.

Magabalik buwas sa senado ang impeachment trial, agud ipresentar sang depensa sang bise presidente ang ila mga saksi nga magapanghiwala sa alegasyon sa article II sang reklamo sa impeachment may kaangtanan sa wala mapaathag nga manggad sang bise presidente.