Ginkalipay ni anay Health Secretary kag sa karon Deputy Majority Leader kag Iloilo Representative Janette Garin sa nangin desisyon sang Department of Justice (DOJ) nga i-withdraw ang mga kaso sa korte angut sa kontrobersiyal nga isyu kaangut sa dengvaxia.
Sa isa ka interview, ginpahayag ni Garin nga nalipay sila sa nasambit nga desisyon kag kun tani malakip na man ang mga scientist ukon health experts nga ginapahayag mas naapektuhan sa nasambit nga kontrobersiya.
Sa pihak sini padayon sa gihapon ang away bangud may mga nakabinbin pa nga mga kaso.
Ginpanindugan ni Garin nga tuman kasakit panumdumon nga ginagamit pamulitika ang ikaayong lawas kag naulamid ang madamu nga mga health experts.
Ginpakigbahin ni Garin nga yara sa 158 criminal cases, 32 civil cases ang ginfile batuk sa ila kag duha diri ang pending sa karon sa SandiganBayan partikular sa Office of the Ombudsman kag pare-pareho ang context sang mga reklamo.
Suno sa Kongresista walo ka kaso ang gilayon nga nadismiss bangud napamatud-an nga wala nabakunahan sang dengvaxia ang mga kabataan.
Nagapanawagan naman si Garin nga kun tani untaton na ang paglikaw sa matuod nga isyu kag indi na paglaumon ang mga ginikanan sang mga bata nga may mabaton sila nga claims.
Ginpahayag man ni Garin nga nakig-simpatiya siya sa mga ginikanan na nadulaan sang mahal sa kabuhi bangud sa Dengvaxia, kag suno pa nga naiintindihan niya ini bangud nabatyagan niya man ini sang tion nga nagtaliwan man ang iya amay sang kasagsagan nga siya ang ginbatikos kag ginkondenar may kaangtanan sa dengvaxia.
