Ginsigurado sang Department of Energy (DOE) ang luwas nga pag-agi sang supply sang langis sang pungsod sa Strait of Hormuz matapos nagpromisa ang Iran nga “safe, unhindered, and expeditious passage through the Strait of Hormuz” sang mga barko nga may bandera sang Pilipinas, subong man ang kaluwasan sang mga tripulante sang Pilipinas.
Sa isa ka post , ginpahayag ni Energy Secretary Sharon Garin nga kabahin ini sang “Risk Management” sang gobyerno agud mabuhinan ang risgo sang delay sang supply sang langis sa tunga sang nagalala nga inaway sa Middle East.
Nahibaluan nga ang Strait of Hormuz may daku nga papel sa pangkalibutanon nga negosyo sang langis bangod nagaagi ini sa daku nga bahin sang suplay sang krudo sa kalibutan.
Apang, ginklaro ni Garin nga wala ini nagakahulugan sang gilayon nga pagnubo sang presyo sang langis sa pungsod.
Suno sa iya, ini nga kasugtanan nagatutok sa pagnubo sang risgo, apang wala sini ginasabat ang malawig nga problema sa enerhiya.
Samtang, lauman sa gihapon ang pagtaas sa presyo sang produktong petrolyo sa masunod nga semana.
Ginabulubanta nga posible magtaas sang P17 tubtub P19 kada litro ang diesel, samtang P3 tubtub P5 ang kada litro sang gasolina.
Magluwas sini, padayon kita nga naga-eksperyensya sang serye sang pagtaas sang presyo sang langis subong nga tuig, nga nagtuga sang daku nga kasakit sa mga motorista kag mga konsumidor.
