Ginpahanumduman sang Department of Labor and Employment (DOLE) ang mga establisimyento nga nagahimo kag nagabaligya sang mga palupok kag lights nga hugot nga magtuman sa occupational safety and health standards (OSH).
Ini agud masiguro ang kaluwasan sang mga mamumugon sa sini nga tion sang holiday season ilabi na nga mataas ang demand sang palupok.
May kaangtanan sini, ginmanduan ni Labor Secretary Bienvenido Laguesma ang tanan nga regional directors sang DOLE nga makig-angut sa Bureau of Fire Protection (BFP), Philippine National Police (PNP), kag local government units (LGUs) agud bantayan kun nagasunod ang mga establisimyento sa nasambit nga pagsulundan.
Tinutuyo man sang tiglikom nga malikawan ang anuman nga aksidente ilabi na ang insidente sang sunog kun sa diin posible nga maulamid ang mga trabahador. Ginpasumiter man ni Laguesma ang mga regional director sang listahan sang mga establisimyento sa idalom sang ila nga monitoring tubtob Enero 10, 2025.
