Nag-isyu sang subpoena ang Department of Labor and Employment (DOLE) batok kay Ateneo de Manila University men’s basketball team head coach Tab Baldwin agud maghatag sang pagpamatuod may kaangtanan sa iya legal nga estado sa pagtrabaho sa Pilipinas.
Sa isa ka press conference, ginpahayag ni DOLE Acting Secretary Francis Tolentino nga ginpatawag si Baldwin sa opisina sang ahensya sa Lunes alas-10:00 sang aga agud magsabat sa mga pamangkot parte sa iya employment status sa pungsod.
Suno kay Tolentino, sa idalom sang Article 40 sang Labor Code sang Pilipinas, may Otoridad ang DOLE nga usisaon kag beripikahon ang employment status sang mga nagatrabaho nga mga pangayaw sa pungsod.
Gindugang pa sang secretary nga wala sang bisan sin-o nga pangayaw nga nagatrabaho sa Pilipinas ang labaw sa kasuguan, bisan ano pa ang iya posisyon, reputasyon ukon institusyon nga ginarepresentar.
Ginpabutyag man sini nga kinahanglan mahibaluan kon may balido kag nagapadayon nga Alien Employment Permit si Baldwin.
Suno sa DOLE, kon nagasunod si Baldwin sa tanan nga kinahanglanon sang kasuguan, wala ini sang dapat kabalak-an.
Apang kon may makita nga paglapas, himuon sang ahensya ang nagakaigo nga tikang.
Ginpasiguro man ni Tolentino nga ang pag-isyu sang subpoena wala nagakahulugan sang pagpanghingabot kundi kabahin lamang sang pagpatuman sang rule of law.
Ang tikang sang DOLE nagasunod sa trahedya sang Hunyo 8 sa isa ka team-building activity sa Dipaculao, Aurora, diin nalunod kag napatay ang duha ka manughampang sang Ateneo nga sanday Rene Baterbonia kag Divine Adili.
Bangud sang insidente, nagdamo ang mga pamangkot kag kontrobersiya nga nagalibot sa pamunuan sang Ateneo kag kay Coach Baldwin.
Samtang, nagapangayo man ang pamilya ni Baterbonia nga magpaguwa ang Department of Justice sang Immigration Lookout Bulletin Order batok kay Baldwin agud masiguro nga magapabilin ini sa Pilipinas samtang ginahimo ang imbestigasyon sa insidente.
