Roxas City – Pormal na ginpahamtang bilang bag-o nga provincial administrator sang probinsya sang Capiz si Dr. Edwin Chinel Monares sa idalom sang administrasyon ni Governor Esteban Evan “Nonoy” Contreras.
Ini ang gin-aprubahan sa ginpatigayon nga session kahapon sang mga board members gikan sa primier kag Segundo distrito sang probinsya sa session hall sang Sangguniang Panlalawigan sa kapitolyo probinsyal.
Antes, ang kumpirmasyon madamo ini anay sang nabaton nga mga palamangkutanon gikan kanday board members Thea Faith Reyes, Matthew Hachuela, Jonathan Sonny Besa kag PCL representative Ferdinand Baguio.
Sa diin nangin kwestyunable sa tanan ang iya diri nga pagtiner sa probinsya.
Kalakip na ang mga palamangkutanon sa iya nga pagkatawo kag kun ano kadugay na siya diri nagaestar sa Capiz.
Apang, ginpahayag ni Monares nga tuig 2014 pa siya nagatiner diri sa probinsya sa diin nagarenta lamang ini sang balay sa Magallanes Street, Barangay 3 sining siyudad.
Magluwas diri, ginkwestyon man ni BM Reyes ang ginpost sadto ni Dr. Monares sa social media sa diin may yara sang ginapahayag pagyabuta para kay anay DILG secretary Mar Roxas kag anay gobernador Antonio Del Rosario.
Sa pihak sini nagsabat lamang sang malip-ot nga pahayag si Dr. Monares natuhoy sa pagpahayag ni BM Reyes.
Mahibaluan nga nakakuha sang napulo nga boto si Monares magluwas lamang sa isa kay BM Hachuela.
Samtang, nagpasalamat naman si Monares sa pagboto kag pagpili sa iya bilang bag-o nga provincial administrator sang probinsya sa idalom sang administrasyon ni Governor Contreras.
