Naghatag sang bulig ang Department of Social Welfare and Development (DSWD) Field Office 3–Central Luzon sa 51 ka pamilya ukon 167 ka indibidwal nga temporaryo nga nagapabilin sa evacuation center sa Lubao, Pampanga.
Ini matapos mapilitan ang mga pamilya nga maghalin bangud sa kalamidad kag indi pa makabalik sa ila mga puluy-an.
Sang Lunes, Agosto 31, upod ang local government, nagresponde ang DSWD sa ila mga kinahanglanon paagi sa Mobile Kitchen, kun sa diin nagpreparar ang mga “Angels in Red Vests” sang mainit kag masustansya nga pagkaon para sa mga evacuees.
Ginpatigayon man ang Psychological First Aid ukon PFA kag Child-Friendly Space ukon CFS activities agud mahatagan sang psychosocial support ang mga evacuees kag mabuligan sila nga maibanan ang stress kag kahadlok bangud sang ila pag evacuate.
Suno sa DSWD, padayon ang ila pagbulig sa mga pamilya nga apektado sang kalamidad, indi lamang sa ila mga kinahanglanon kundi pati man sa ila psychosocial well-being.
Ini agud mabatyagan gihapon sang mga evacuees ang pag-atipan kag suporta sang gobyerno bisan yara sila sa evacuation center.
Ang amo nga tikang ginapatuman suno sa direktiba ni President Ferdinand R. Marcos Jr. nga siguruhon nga wala napabay-an ang mga Pilipino sa tion sang kalamidad.
