ROXAS CITY – Nagapanawagan ang Department of Social Welfare and Development (DSWD) Field Office VI sa mga barangay officials sang probinsya sang Capiz nga unahon anay nga hatagan sang ayuda ang mga vulnerable sector ukon ang mga pumuluyo nga tuman nga naapektuhan sang kalamidad ukon ang mga pigado.
Sa interview sang Bombo Radyo kay DSWD Region 6 Director Joselito Estember, iya ginpahayag nga may yara sang mga barangay officials nga biktima man sang kalamidad kag mahimo ang mga ini nga akomodoron kag i-reassess sang ahensya apang unahon anay ang mga pumuluyo nga nasakopan sa paghatag sang cash assistance sa idalom sang emergency cash transfers program.
Nahibaluan nga ginpahayag ni Barangay Kagawad Teodoro Arcega Jr. sang Inzo, Roxas City nga ang 30 ka mga pangalan lakip na siya nga yara sa listahan bilang benepisyaryo sang ayuda amo ang mga nagbulig sa pag-evacuate sa mga pumuluyo, nagluto para sa mga evacuees kag naghatag sang serbisyo sang bagyo Ramil.
Gindepensahan sini ang iya kaugalingon kag ang iya utod nga nalakip sa 30 nga yara sa listahan sang barangay bangud suno sa iya, yara sila sa barangay nga nagaserbisyo kag nagahulag agud mabuligan ang mga pumuluyo samtang ginabaha ang ila lugar.
Samtang suno naman kay Director Estember, wala sang may nabaton nga report ang ahensya nga may yara sang grupo ukon indibidwal ukon opisyal sang barangay nga nagabuhin sang ayuda nga ginahatag sa mga pumuluyo nga biktima sang kalamidad sa Capiz.
Apang pahayag niya, bukas ang Department of Social Welfare and Development Field Office 6 sa mga reklamo sang mga pumuluyo.
Mahimo ipaagi sa sulat, email ukon personal nga pagpadulong sa opisina ang reklamo nahanungod sa cash assistance.
Ginpasalig sang ahensya ang publiko nga protektado ang mga ini sang DSWD kag indi dapat nga magkahadlok nga magreport.
