ROXAS CITY – Ginkumpirmar sang talatapan sang Department of Trade and Industry (DTI) – Capiz, nga gin-aprubahan sang ila ahensiya ang hinyo sang mga manufacturer nga pataasan ang presyo sang pila ka mga basic necessities and prime commodities, sadtong bulan sang Mayo, sini nga tuig.
Sa interview sang Bombo Radyo kay Ms. Juvy Benliro, ginpahayag sini nga may 82 ka mga sahi sang prime commodities nga nagdugang sa ila nga SRP.
Ginalakipan ini sang bottled drinking water, canned sardines ukon beef, gatas, langgaw, tuyo, patis, noodles, kape, asin, detergent kag laundry soap, candles, flour kag iban pa nga masami ginabakal sa grocery stores.
May pagtaas nga 2% tubtob 10% sa SRP sang amu nga mga produkto, kaangay sa isa ka brand sang sardinas, kun sadto anay nagabalor sa P16.60 ang isa ka lata, mangin P17.25 na ini, gani may price increase nga 3.9%.
Dugang pa sini, nga mabatyagan sang mga konsumidor ang pagsaka sa SRP sang nasambit nga mga produkto sa Hunyo 19, sini nga tuig, 60 diyas matapos nga gindeklarar ang Western Visayas kalakip ang Capiz sa idalom sang State of Calamity.
Ginalantaw nga rason sa pagtaas sa presyo sang mga balaklon amu ang giyera sa Ukraine kag Russia, subong man ang padayon nga pagtaas sa presyo sang produktong petrolyo.
Ginpasalig man sang DTI-Capiz nga ginamonitor nila ang mga local manufacturers nga dapat magsunod sa pagsulondan sang SRP.
