CAPIZ-Nagpasaka sang dugang nga tatlo ka counts sang perjury ang Cordero & Associates, The Law Firm of Atty. Kaiser T. Cordero & Associates, bilang abogado nanday former Cuartero, Capiz Mayor Tito L. Mayo, incumbent Sangguniang Bayan Member Eileen H. Palmes, kag Jacquilyn C. Galino, batok sa anay empleyado sang Capiz Provincial Capitol nga si Fernando F. Garcia Jr.
Si Garcia ang anay nagtrabaho sa opisina ni former Board Member Eleuper Martinez kag Board Member Aldwin Cruz-Am .
Ang reklamo ang gin-file sa Office of the City Prosecutor sang Roxas City, Capiz, kaangot sa mga pahayag nga ginhimo ni Garcia sa iya sworn Complaint-Affidavit may kaangtanan sa mga alegasyon batok sa mga complainant.
Suno sa complaint-affidavit, si Garcia ang nagpatuman sang isa ka Complaint-Affidavit sang Pebrero 13, 2024, nga iya gin-subscribe kag ginpanumpaan sa atubang ni Associate Provincial Prosecutor JP Anthony D. Canada sa Hall of Justice, Roxas City, Capiz.
Sa amo nga dokumento, gin-alegar nga naghimo si Garcia sang mga ginakabig indi matuod nga mga pahayag nahanungod sa pagpanag-iya, financial interest, participation, pag-isyu sang permits, franchise, kag ginapatihan nga withholding sang mga dokumento nga may kaangtanan sa Gallera de Cuartero, Incorporated.
Lakip sa mga ginatudlo nga pahayag amo ang alegasyon nga sanday Palmes kag Galino may ginadumalahan, ownership, operation ukon pecuniary interest sa Gallera de Cuartero, Incorporated.
Gin-angot man sa complaint ang isa ka alegasyon batok kay Mayo nahanungod sa ginapatihan nga pag-withhold sang mga kopya sang ordinansa kag resolusyon may kaangtanan sa pagtukod sang gallera.
Apang, suno sa complaint, si Garcia sang ulihi ang nagpatuman sang mga sworn documents, lakip ang Affidavit of Desistance kag Notarized Omnibus Motion [To Recall and Set-Aside Decision] nga may petsa September 30, 2025.
Sa amo nga mga dokumento, ginapahayag nga gin-withdraw, gin-recant kag gin-repudiate ni Garcia ang iya mga nauna nga alegasyon.
Ginlaragway man niya ang iya mga nauna nga alegasyon bilang resulta sang “misapprehension, misunderstanding and emotionally driven reactions,” kag ginpahayag nga ini mga “UNTRUE” kag isa ka “PERVERSION OF TRUTH.”
Ginapangayo sang mga complainant sa Office of the City Prosecutor nga usisaon ang reklamo, lakip ang mga documentary kag iban pa nga ebidensya nga kalakip sini, kag magpasaka sang nagakaigo nga kaso kon makita nga may legal nga basehan.
Ang perjury nagapatuhoy sa paghimo sang kabutigan nga pahayag.
Nahibaluan nga si Garcia amo man ang anay nagpasaka sang administrative complaints batok kay Capiz Governor Fredenil ‘Oto’ Castro, Vice Governor Jaime ‘Mitang’ Magbanua, kag tatlo pa ka opisyal may kaangtanan sa pagkuha sang 14 ka pribado nga abogado bilang legal consultants.
