Ginbasura sang korte ang election protest ni anay mayoral candidate nga si Christopher Vincent T. Andaya batok kay Sigma, Capiz Mayor Dante Rizal Eslabon.
Sa 43 ka pahina nga desisyon sang Regional Trial Court, 6th Judicial Region sa Mambusao, Capiz nga ginpagwa sang Marso 2, 2026, ginpahayag nga napaslawan ang kampo ni Andaya nga makasumiter sang nagakaigo nga mga dokumento agud masuportaran ang iya election protest nga ginfile sang Mayo 22, 2025.
Sa interview sang Bombo Radyo kay Mayor Eslabon, iya ginpahayag nga naghalinan ang kaso sa resulta sang May 12, 2025 midterm elections kun sa diin nagkontra sila ni Andaya sa pagka-alkalde sang banwa sang Sigma.
Suno kay Mayor Eslabon, bisan ginpahanugotan ang recount kag may 56 ka contested votes nga gin-credit kay Andaya, indi gihapon ini bastante agud malapawan ang total nga boto nga nakuha ni Eslabon.
Ginpasalig man ni Mayor Eslabon sa mga pumuluyo nga magapadayon, tampad kag de-kalidad nga serbisyo publiko, ilabi na sa pagbulig sa mga pigado kag sa tanan nga sektor sang banwa.
Matandaan nga nakakuha si Eslabon sang 9,884 ka boto sa eleksyon, samtang 9,778 ka boto naman ang nakuha ni Andaya.
