ROXAS CITY, CAPIZ– Ginpatigayon ang Electrical Safety and Standards Seminar on Basic Installation and Electrical Auditing sa Governors Hall, Capiz Provincial Capitol, Roxas City.
Ginpangunahan sang Institute of Integrated Electrical Engineers of the Philippines Inc. Capiz Chapter sa kolaborasyon sa mga katapo sang Bureau of Fire Protection kag Capiz State University ang amu nga kahiwatan.
Kaupod sang mga barangay electricians nagikan sa pili nga barangay sa tagsa ka banwa sang probinsya, ginhatagan sang hugot nga pagtamod ang may kaangtanan sa electrical connections sa tagsa ka mga puluy-an ukon establisyemento.
Sa interview sang Bombo Radyo kay Fire Superintendent Kim Celesio, Fire Marshall sang Bureau of Fire Protection Capiz, ginpahayag nga ang katuyuan sang sini nga programa amu ang paghatag sang ihibalo sa mga barangay electricians may kaangtanan sa insakto kag nagakadapat nga pag-align sang mga electrical wirings kag connection agud makalikaw sang sunog.
Dugang pa sini, ang seminar ang ginkalakipan sang lecture kag practical examination nga ginpatigayon sang mga propesor nga electrical engineers nagikan sa Capiz State University (CAPSU) kag ang iban nagikan man sa Capiz Electric Cooperative, Inc. (CAPELCO).
Nahibaluan nga ang isa sa top-reason sang sunog amu ang electrical in nature ukon ang kuryente, kun sa diin ginsiling sini nga kun indi standard ang mga gamit sa pag-align sini kag sala ang pagtakod, mahimo gid nga magtuga sang sunog.
Samtang, nagpalab-ot naman sang mensahe si Celesio sa publiko nga kinahanglan checkyaron mayad kag pasiguruhon ang pagpatakod sang electrical connections kag indi mag gamit sang mga substandard nga materyales; permi man nga pasiguruhon nga nakapang-bugnot ang tanan nga mga nakasaksak sa kuryente sa tion nga maglakat agud nga malikawan ang sunog.
