DUMARAO, CAPIZ- Pilason ang isa ka high school nga estudyante matapos naigo sang bala sang armas-luthang sa Barangay Astorga, Dumarao Capiz.
Ang biktima amo si alyas “Justine”, menor de edad kag residente sang Sitio Tagulab, Barangay Poblacion Ilawod sang nasambit nga banwa.
Sa interview sang Bombo Rdayo kay Police Lieutenant Russel G. Husmalaga, Deputy Chief of Police sang Dumarao Municipal Police Station, iya ginpahayag nga samtang ginasubay sang biktima ang dalan sa Brgy. Dacuton padulong kuntani sa Brgy. Astorga kaupod ang iya mga abyan nga sanday alyas “Rafael”, kag alyas “James” sakay ang motorsiklo nagpondo sila bangud naaberya.
Apang nakabati sila sang tatlo ka lupok sang armas luthang rason nga nagdalagan kag nagpanago.
Natalupangdan nalang sang biktima nga may pilas na ini sya sa iya tuo nga tiil kag dalunggan sa diin gilayon nga ginpadangat sa ospital para sa nagakaigo nga pagbulong.
Narekober sa lugar ang duha (2) ka basiyo sang 12-gauge shotgun nga armas-luthang.
Sa karon padayon ang imbestigasyon sang kapulisan angut sa nasambit nga insidente.
Interviewed by Bombo Jessa Mae De Los Santos
