Nagsarurot na sa P8/kilo ang farmgate price sang kamatis, samtang yara sa tunga-tunga ang harvest season, sandig sa monitoring sang Samahang Industriya ng Agrikultura (SINAG).
Ini isa ka bulan lamang halin sadtong naglab-ot sa P350 ang kada kilo sang retail price sini.
Suno kay SINAG executive director Jayson Cainglet, piyerde na ang mga mangunguma bangud sa nasambit nga presyo samtang madamo sa ila ang mas ginapili nga indi mag-ani.
Rason ni Cainglet, mas mataas ang magastos kun nag-ani kun ikumparar sa pagakitaon kun ibaligya ang mga ini.
Apisar wala sang reklamo gikan sa mga konsyumer kun manubo ang presyo sang kamatis sa mga merkado, tuman naman ang pagkapiyerde sang mga mangunguma nga amu ang nagapanguna nga naapektuhan sang manubo nga farmgate price.
Base sa monitoring sang Department of Agriculture (DA) sa mga merkado sa Metro Manila, ang retail price sang kamatis ang nagahampang lamang halin P35 tubtob P70 kada kilo.
Suno sa SINAG, kinahanglan nga solusyunan sang gobyerno ang manubo nga farmgate price kag maghimo sang nagakaigo nga tikang agud indi asud-asosd ang pagkapiyerde sang mga nagatanom sang kamatis.
