Sigurado nga magapasakop si Pinay tennis star Alex Eala para sa Pilipinas sa 2026 Asian Games sa Japan, ano man ang desisyon sang Women’s Tennis Association ukon WTA sa ginahingyo nga waiver para sa iya absence sa China Open.
Suno kay Philta Executive Director Tonette Mendoza, desidido si Eala nga magpasakop sa Asian Games bisan may yara sang posible nga penalidad gikan sa WTA.
Si Eala ang nagsulod sa women’s singles and doubles event sa Asian Games nga pagahiwaton sa Aichi-Nagoya, Japan.
Sa nagligad nga Asian Games sang 2023, nagdala siya sang duha ka bronze medals sa singles kag mixed doubles.
Ginpahayag naman ni Philippine Olympic Committee President Abraham Tolentino, nga isa ka daku nga bagay ang desisyon ni Eala nga unahon ang paghampang para sa bandera kag pungsod.
