Ginkumpirma ni Agriculture Secretary Francisco “Kiko” Tiu Laurel Jr. nga natalana nga makabalik sa pungsod sa Sabado, Hunyo 21, alas 5: sang aga ang delegasyon sang mga Pinoy nga na-stranded sa Israel sa tunga sang nagainit nga tensyon batuk sa Iran.
Suno kay Tiu Laurel, nagpatigayon ang Department of Agriculture (DA) sang pila ka opsyon agud luwas nga ma-repatriate ang grupo, kalakip na ang posible nga ruta paguwa pinaagi sa Egypt.
Sang ginpamangkot ang tiglikom kun may direkta nga komunikasyon ang departamento sa delegasyon, ginpahayag ni Tiu Laurel nga adlaw-adlaw nila ini nga ginatawgan kag ginaistorya.
Nagpabutyag man ini sang paglaom nga mangin luwas ang pagpauli sang grupo, nga yara sa Israel para sa isa ka opisyal nga misyon sang nagluntad ang tensyon.
Suno sa Embahada sang Pilipinas sa Tel Aviv, may 21 ka opisyal nga Pilipino sa Israel kun sa diin 17 sa ila ang nagtambong sa agricultural technology training nga nagsugod sadtong Hunyo 10 kag magatakop kuntani sa Hunyo 20, samtang ang apat mga espesyalista sa industriya sang gatas gikan sa DA.
