Gin-ako sang Food and Drug Administration (FDA) nga may kakulangan sa ila nga manpower sa pagtapna sang nagalapnag nga baligyaanay sang counterfeit kag unregistered nga health products online.
Suno kay Food and Drug Administration Director General Paolo Teston, nagabaton ang ila ahensya sang 254,000 ka mga applications sa kada tuig apang yara lang sa 250 ang mga technical eveluators.
Pahayag pa niya, may masobra 3,000 ka mga pending nga administrative cases nga naglapas sa Republic Act 3720 nga gin-ammend sang Republic Act 9711 kun sa diin ang mga offender ang iligal nga manufacturer, importer kag distributor sang mga indi rehistrado nga health products.
Nagpasalig man ang natungdan, nga pagatinguhaon nila nga makaayo ang sistema agud nga mangin smooth na ang dalagan sang pagserbisyo sang talatapan.
