Isa ka babaye sa Ohio, United States of America ang nakaupod liwat sa iya hinuptanan nga ido matapos ini nadula sang 2017, siyam ka tuig na ang nakaligad.
Suno kay Sharon Kelly, isa ka residente sang Youngstown, ang iya shih tzu nga si Saleo, naglakat-lakat lang sa ila ugsaran sang hinali lang ini nga nadula, gani ginpangita niya ini kag sang iya pamilya.
Sa sulod sang mga tinuig, ginsundan nila ang pila ka mga report sang mga ido nga daw kaanggid kay Saleo, apang wala sila magmadinalag-on sa pagpangita sa iya.
Natapos ang ila pagpangita sang ang iya apo nga lalaki nagpasa sang isa ka post gikan sa Mahoning County Dog Warden nahanungod sa isa ka gamay nga ido nga may super fluffy nga balahibo nga nakit-an sa Fellows Riverside Gardens.
Ginkumpirma ni Kelly ang identidad ni Saleo paagi sa mga daan nga litrato kag ang iya pinasahi nga mga marka sang nagbisita ini sa opisina sang Dog Warden pagkadason nga adlaw. Suno kay Kelly, ginabanta 10 anyos na si Saleo.
Madinalag-on naman nga nakuha ni Kelly ang iya nga ido kag nagpasalamat sa nag-atipan sang maayo sa sulod sang 9 ka tuig antes niya ini nga nakit-an kag nakaupod liwat.
