Naghatag sang bag-o nga kadungganan sa probinsya sang Capiz ang isa ka Capisnon nga atleta matapos ini madinalag-on nga makuha ang bulawan kag bronze medal sa nagapadayon nga Palarong Pambansa 2026 sa Agusan del Sur.
Ginkilala ang atleta nga si Gemwel M. Edaño, tumandok sang Brgy. Duyoc, banwa sang Dao, Capiz kag estudyante sang Luis Escutin National High School.
Nakuha ni Edaño ang bulawan nga medalya matapos sini gindominar ang Shot Put event sa idalom sang Paragames – Visual Impairment Boys (T11) category.
Dugang pa diri, nakakuha man ini sang bronze medal sa 100-meter dash sa amo man nga kategorya.
Pinaagi sa iya dedikasyon kag pagpaninguha bilang representante sang Western Visayas, ginbayaw ni Edaño ang bandera sang rehiyon kag nagdala sang dugang nga bugal kag kadungganan indi lamang sa iya buluthuan kundi sa bug-os nga probinsya sang Capiz.
Sa pihak sang iya sitwasyon bilang visually impaired athlete, ginpamatud-an ni Edaño nga wala sang makapugong sa isa ka tawo nga maabot ang iya handum kag mangin inspirasyon sa iban nga pamatan-on nga atleta.
Sa mensahe sang Gobyerno Probinsyal sang Capiz sa idalom sang liderato ni Fredenil H. Castro, ginapaabot ang mainit nga pagdayaw kag pagpanginbulahan kay Edaño bangud sang iya ginpakita nga talento, determinasyon kag pagdala sang kadungganan sa probinsya.
