ROXAS CITY – Nagdangop sa Bombo Radyo ang isa ka concerned citizen agud i-reklamo ang ginapahayag paghaboy kag pagsuga sang mga nagamit nga personal protective equipments (PPE’s) sang Out-Patient Department sang Roxas Memorial Provincial Hospital sa Capitol Hills, Barangay Lanot, Roxas City.
Suno kay Roy, tuman sila nga nahangawa bangud sa posible malain sini nga matuga sa ikaayong-lawas sa ila nga mga residente.
Ginpahayag sini nga una siya nga ginsugiran sang iya abyan natuhoy sa nagabalik-balik nga trak nga may karga nga mga basura gikan sa amo nga ospital kag ginatambak sa ila lugar.
Diri kag aktwal mismo nga nakuhaan sang video ni Roy ang pag-abot sang isa ka trak nga may ginatambak nga basura.
Suno sa iya nga nakit-an sini mismo nga ginsug-an ang mga basura apang may nagpauntat sini rason nga wala nadayon.
Indi naman mapat-od ni Roy kun san-o pa nagsugod ang pagtambak sang basura sang nasambit nga ospital sa ila lugar.
Apang base sa iya pagpangusisa, ginapahayag nga mismo ang head nurse kag ang pamunuan sang ospital ang nagmandu nga didto itambak ang mga basura sa ila lugar.
Bangud sa tuman ka pagkahangawa, ginpalab-ot na sini ang amo nga problema sa ila punong barangay.
Suno kay Roy nga luyag niya lamang maathagan kun ano bala ang ensakto nga protocol sa pag-dispose sang hospital garbages.
Panindugan pa niya nga ang nasambit nga aktwasyon ang nagabutang sa peligro sa ikaayong-lawas sang pumuluyo ilabi pa nga ang nasambit nga ospital ang ginakabig nga provincial COVID-19 hospital sang Capiz.
