ROXAS CITY — Nadakpan sang mga katapo sang Criminal Investigation Detection Group ukon CIDG – Capiz sa isa ka firearms buybust operation ang isa ka ginasuspetsahan gunrunner sa Barangay Barra sining siyudad.
Ginkilala ang arestado nga si Victor Kazin, residente sang Barangay Culasi, Roxas City kag ginapahayag masami sa shop sang isa ka gunsmith sa Barangay Barra kun sa diin ini nadakpan.
Suno sa hepe sang CIDG – Capiz nga si PCI John Paul Tuvera, nakigtransakyon sa ila si Kazin nga magbaligya sang isa ka unit sang 12-gauge shotgun sa balor nga P15,000 kag isa ka unit sang .45 caliber pistol nga nagabalor P9,000.
Ginapahayag nga makaduha ka beses pa nga ginpalupok ni Kazin ang mga armas antes niya ini ginhatag sa poseur buyer.
Magluwas sa nabakal nga mga armas sa arestado, may yara pa sang .38 caliber revolver kag .22 caliber revolver sa lugar nga ginapahayag ginpakay-o didto sang isa ka security agency.
Gina-validate naman sang otoridad kun matuod nga isa ka security agency ang nagapanag-iya sini nga mga revolver.
Samtang nagpamalibad naman nga maghatag sang pahayag sa Bombo Radyo si Kazin angut sa natabo.
Magapangatubang si Kazin sang reklamo nga paglapas sa Sec. 32 sang RA 10591 ukon iligal nga pagbaligya sang armas-luthang.
