Ginbasura sang Supreme Court ang ginhingyo ni Senator Ronald “Bato” Dela Rosa nga temporary restraining order (TRO) batuk sa arrest warrant nga ginpaguwa sang International Criminal Court (ICC) may kaangtanan sa kaso nga crimes against humanity nga konektado sa war on drugs sang administrasyon ni anay Presidente Rodrigo Duterte.
Sa resolution nga ginpaguwa sang korte subong nga Miyerkules, ginbasura sang Supreme Court ang petisyon ni Dela Rosa para sa interim relief pinaagi sa 9-5-1 nga boto.
Una na nga nag-file si Dela Rosa sang “very urgent” manifestation agud magpangayo sang TRO nga magapugong sa posible nga pag-aresto kag turnover sa ICC sa iya kun maaprubahan ang warrant.
Sa 117-page nga petisyon, ginpahayag sang senador ang iya “unmistakable right to be protected” kasunod sang insidente sang linagsanay sa sulod sang Senado samtang ginlikawan ang mga otoridad nga nagtinguha magserbi sang warrant.
Duha ka adlaw pagkatapos sang amo nga insidente, naghalin si Dela Rosa sa Senado kasunod sang tensyon sa tunga sang Senate security personnel kag mga National Bureau of Investigation (NBI) agents.
