ROXAS CITY – Halos indi makapati ang isa ka 16-anyos nga Grade 10 student matapos nga nakakuha sang bronze medal sa 2020 International Mathematics Open For Young Achievers.
Ini ang ginpahayag ni Jenz Nielsen Agujitas sang Filamer Christian University sang mainterview sang Bombo Radyo.
Suno kay Agujitas nga wala sini ginaekspektar nga mangin bronze medalist sa nasambit nga contest.
Aminado ini nga bisan siya mismo ang nabudlayan man kun kaisa sa Mathematics subject.
Apang, wala ini nadulaan sang paglaom bangud nagapati ini sa iya kaugalingon nga mangin madinalag-on sa nasambit nga kumpetisyon kag mangin proud ang iya nga pamilya.
Mahibaluan ang 2020 International Mathematics Open for Young Achievers ang ginpatigayon sa Bangkok Thailand sadtong Disyembre 1 tubtob 2.
Makabig si Agujitas nga isa sa Filipino Math wizards nga nagpa-register online kag nagpakigbahin sa nasambit nga kompetisyon thru virtual.
