Ginhatagan sang International Criminal Court (ICC) sang tubtob Hulyo 1 ang prosekusyon agud magpresentar sang ebidensya nga pagagamiton para sa confirmation hearing sa Setyembre 23, 2025 sang kaso nga crimes against humanity batuk kay former President Rodrigo Duterte.
Ang mandu ginpirmahan ni ICC pre-trial Chamber 1 Judge Julia Antoanella Motoc, Judge Reine Adélaïde Sophie Alapini-Gansou, kag Judge María del Socorro Flores Liera kun sa diin sila man ang nagtalana sang timeline para sa aktibidad sa confirmation hearing.
Nahibaluan nga maga-file ang prosekusyon sang 8,565 ka panid sang ebidensya batuk kay Duterte sa atubang sang ICC.
Ginpahayag ni ICC Prosecutor Karim Khan nga magluwas diri, magagamit man ang prosekusyon sang visual kag audio evidence; 9 ka litrato kag halos 16 ka oras sang video.
Ini ang ginpahayag ni Khan sa iya nga sabat sadtong Abril 4 sa mga hukom sang Pre-Trial Chamber angut sa pagpatigayon sang hearing para sa kumpirmasyon sang mga kaso. Isa ka redacted (may mga bahin nga gintakpan) nga bersyon ang ginsapubliko sadtong Abril 15.
Ginhatagan pagtamod sang prosecutor nga ang nasambit nga ebidensya ang kabahin lamang sang kabug-usan nga ebidensya nga pagagamiton sa kumpirmasyon sang mga kaso.
Dugang pa ni Khan, padayon sa gihapon nila nga gina-review ang ila nga mga materyales antes i-report ang kabug-usan nga kadamuon sang ebidensya sa korte.
Si Former Pres. Duterte ang akusado para sa kaso nga crimes against humanity may kaangtanan sa iya kampanya sa war on drugs sadtong siya pa ang alkalde sang Davao tubtob sa nangin Pangulo sang Pilipinas.
Ginsiling man ni Khan nga luyag nila nga magpresentar sang maximum nga duha ka testigo para sa viva voce kag sa confirmation hearing.
