Nagapati ang IBON Foundation nga may husto nga proseso kasunod sang pagpahalin sa house of representatives kay Cavite 4th District Rep. Kiko Barzaga bangud sa disorderly behavior nga wala nagakaangay nga pamatasan bilang isa ka mamalidha.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga ang amo nga tikang sang Kamara may ginasunod nga proseso kag indi lamang gilayon nga ginadesisyunan sang isa ka kongresista ukon sang tagsa ka miyembro sang House of Representatives.
Suno kay Africa, posible nga may yara man sang nagkalain-lain nga motibo sa likod sang amo nga desisyon, apang importante nga tan-awon ang opisyal nga proseso antes maghimo sang konklusyon.
Ginpaghayag man sini, indi dapat magpabilin ang pagtan-aw sang publiko sa mga kontrobersyal ukon sensasyonal nga bahin sang isyu lamang, kundi kinahanglan nga sabton man ang legal kag institusyonal nga mga proseso nga ginapatuman sang Kamara.
Matandaan nga sa boto nga 265 pabor, 14 kontra, kag 8 nag-abstain, gin-aprubahan sang Manubo nga Panalgan ang rekomendasyon sang House Committee on Ethics and Privileges nga papanaugan sang pinakamabug-at nga silot ang kongresista.
