Nagmandu ang Pre-Trial Chamber sang International Criminal Court (ICC) nga ipaidalum sa medical examination si anay Presidente Rodrigo Duterte.
Ini agud mahibaluan kun nagakadapat ang anay presidente nga magpaidalum sa pre-trial proceedings lakip na ang kumpirmasyon sang mga panumbungon.
Naghatag sang order ang tatlo ka mga judge nga sanday Judges Iulia Antoanella Motoc, Reine Adélaïde Sophie Alapini-Gansou, kag María del Socorro Flores Liera, agud nga ma-facilitate sang Registry ang medical examination.
Ginmanduan man nila ang Registry nga magpatigayon sang medical examination kag ihatag ang kompleto nga rekord sang anay Presidente sa isa ka panel sang tatlo ka independent medical experts.
Ang mga medical panel ginabug-usan sang isa ka forensic psychiatrist, isa ka neuropsychologist, kag isa ka geriatric kag behavioral neurologist.
Ginalauman nga magahatag sila sang rekomendasyon sa anuman nga pinasahi nga mga tikang nga kinahanglanon agud masiguro ang patas kag nagakaigo nga hearing sa kaso sang anay presidente.
Natalana naman ang pag-file sang rekord sa Registry sa Oktubre 31.
Madumduman nga gin-postpone ang confirmation of charges hearing sang Setyembre 23 sa hingyo sang defence team.
