Gindumilian sang Philippine Government paagi sa Department of Agriculture ang pag-import sang poultry, domestic kag wild birds gikan sa Argentina kasunod sang paglapta sang bird flu sa nasambit nga pungsod sa South America.
Sa isa ka statement nagpaguwa si Department of Agriculture Secretary Francisco Tiu Laurel Jr. sang Memorandum Order No. 48, nga nagadumili sang pagsulod sa pungsod sang karne sang manok, day-old chicks, itlog, kag semilya para sa artificial insemination gikan sa Argentina.
Gin-isyu ang import ban matapos natukiban ang highly pathogenic avian influenza (H5N1) bird flu subtype sa northern region sang Buenos Aires sang Agosto 17.
Suno sa DA, ginreport sang mga otoridad sang Argentina ang avian flu outbreak sa World Organization for Animal Health (WOAH) sang Agosto 20.
Samtang, ginhatagan pagtamod sang DA nga padayon sini nga ginabantayan ang mga nagakatabo sa bug-os nga kalibutan agud maprotektahan ang lokal nga industriya sang manok kag ikaayong lawas sang publiko.
