Ginalauman sang Bangko Sentral ng Pilipinas (BSP) nga magahinay ang inflation rate ukon pagtaas sa pangkabug-usan nga lebel sang presyo sang mga balaklon kag serbisyo sa pungsod.
Sa forecast sang central bank, ginabulubanta nga magahinay sa 0.5% tubtob sa 1.3% ang inflation rate.
Mas manubo ini kun ikumpara sa 1.4% inflation rate nga narekord sang bulan sang Hunyo sa subong nga tuig.
Paathag sang BSP, nga ang nakita nga nagapanguna nga naka-amot sa mga presyo sang Hulyo amo ang mas mataas nga presyo sa karne kag otan tuga sang pagpanglaslas sang mga kalamidad, subong man ang pagtaas sang sukot sa kuryente, presyo sang mga produkto petrolyo sa pungsod kag ang pagluya sang balor sang piso.
Apang, posible ini nga ma-offset sa pagpadayon nga pagnubo sang presyo sang bugas.
