Isa ang patay kag tatlo ang pilason sa komosyon nga nagluntad sa tunga sang magpamilya kag suspek sa Brgy. Rizal, Pontevedra, Capiz
Ang napatay amo si alyas “Ron,” 43-anyos kag isa ka mekaniko.
Ang mga pilason naman amo sanday alyas “Ann,” 52-anyos, alyas “Jis,” 25-anyos, kag alyas “Jir,” 49-anyos.
Samtang ang suspek amo si alyas “Jim,” 49-anyos, lunsay residente sang nasambit nga lugar.
Sa interview sang Bombo Radyo kay Police Captain Dennis Losbañes, Officer-in-Charge sang Pontevedra Municipal Police Station, iya ginpahayag nga nagapanghimus si alyas “Ann” sa ila balay sang nag-abot si alyas “Ron” nga may dala nga galon.
Suno kay Losbañes, sang nakita sang suspek si alyas “Ron,” hinali sini ginlampusan sa ulo ang biktima gamit ang matig-a nga bagay.
Sang nakita ini sang mga miembro sang pamilya sang biktima, gilayon nila nga ginbuligan ang biktima nga nagresulta sang rambol.
Sa subong, preso na sa Pontevedra Municipal Police Station ang suspek kag magapangatubang sang kaso nga homicide.
