ROXAS CITY -Padayon ang imbestigasyon sang Pontevedra Municipal Police Station sa isa ka lending collector nga ginaalegar ginhold-up sa Barangay Binuntucan, Pontevedra, Capiz.
Ginkilala ang biktima nga si Ronaldo Alcazaren, 22-anyos residente sang Sitio Catmon, Barangay Navitas, Panay, Capiz.
Sandig sa inisyal nga imbestigasyon ni Police Staff Sergeant Rhea Batuigas, nagaguwa nga samtang ginasubay sang biktima ang dalan sakay sa iya motorsiklo, ginbangaan ini sang tatlo ka mga persona kun sa diin ang isa diri ang nagasuksuk sang long sleeves nga nagaduag pula.
Nataban sang mga kawatan ang back pack sini nga may unod nga mga kagamitan kag kwarta.
Kalakip sa mga nataban amo ang isa ka tablet, wallet sini nga may unod nga P1,000 nga cash, kag ginbulubanta P50,000 cash nga iya koleksiyon.
Nakaangkon naman sang pilas sa magkatuhay nga porsyon sang kalawasan si Alcazaren matapos nga gintuyo sini nga lagson ang mga kawatan.
Samtang padayon pa nga ginatumod sang mga kapulisan ang mga nasambit nga suspetsado.
