ROXAS CITY – Unod sang halos tanan nga pamantalaan sa Japan ang kadalag-an sang makabig nila nga Japan’s “Monster” pag-abot sa boxing nga si Naoya Inoue, batuk sa pambato sang Pilipinas nga si Nonito “The Filipino Flash” Donaire, sa ila nangin sambuwa kagab-i, sa Super Arena, sa Saitama, sa nasambit nga pungsod.
Sa interview sang Bombo Radyo kay Bombo International Correspondent Mr. Josel Palma, direkta sa Japan, ginpahayag sini nga tubtob sa karon nagakinasadya ang mga Hapones bangud gintapos ni Inoue ang hinampang sa sulod gid lamang sang 2 rounds.
May yara man nga Filipino suno diri nga nagsuporta kay Inoue apang sa pihak sini, dapat man suno diri nga mangin proud kay Donaire bangud nangin maisog ini sa liwat nga pag-atubang sa bataon nga Hapon.
Matandaan nga napaslawan na sadto si Donaire kay Inoue sang tuig 2019, rason nga sa karon, hawid ni Inoue ang record nga 23 wins, 20 diri ang knockout kag wala sang kapiyerdehan, samtang si Donaire ang may 42 wins, 28 diri ang knockouts kag 7 ka mga kapiyerdehan.
