Naglab-ot na sa P6.16 bilyon ang kabug-usan nga kahalitan sa imprastraktura, samtang naglab-ot naman sa P2.32 bilyon ang kapyerdihan sa sektor sang agrikultura bangud sang padayon nga epekto sang Southwest Monsoon ukon Hanging Habagat, suno sa Office of Civil Defense (OCD).
Base sa report sang OCD Disaster Preparedness Service nga ginapangunahan ni Tomas, kapin 724 ka lugar na sa bug-os nga pungsod ang direkta nga naapektuhan sang malain nga panahon, mabaskog nga pag-ulan, kag malapad nga pagbaha.
Sa subong, padayon ang pag-assess kag pagberipika sang mga otoridad sa mga nawasak nga dalan, tulay, kag iban pa nga pampubliko nga pasilidad, pati na man sa mga nahalitan nga pananom kag ulomhan.
Ginsiguro naman sang OCD nga padayon ang ila pagpakig-angut sa mga local government kag iban pa nga ahensya sang gobyerno agud madasig nga mahatag ang kinahanglanon nga bulig sa mga komunidad nga naapektuhan.
Nagpaandam liwat ang mga otoridad sa mga residente nga nagaistar sa mga manubo nga lugar kag flood-prone areas nga magpabilin nga alerto kag magsunod sa mga pahibalo sang local government kag mga disaster response team.
