Gin-ako ni Department of Social Welfare and Development (DSWD) Secretary Rex Gatchalian nga daku nga kabudlay ang kakulang sang kompleto kag updated nga database sang mga driver sa bilog nga pungsod, gani madamo nga benepisyaryo ang wala gilayon nalakip sa master list para sa pagpanagtag sang ayuda.
Suno kay Gatchalian, nagasalig ang ahensya sa mga listahan nga ginahatag sang nagkalain-lain nga sources, lakip na ang Land Transportation Franchising and Regulatory Board ukon LTFRB kag mga local government.
Apang indi permi updated ang ini nga mga listahan bangud nagabag-o-bag-o ang mga driver, ilabi na sa sektor sang jeepney kag tricycle.
Dugang pa niya, indi man tanan nga driver sang Transport Network Vehicle Service ukon TNVS, two-wheel ride-hailing kag delivery services ang gilayon nalakip sa listahan.
May yara man sang mga platform nga nagatago ukon wala nagahatag sang pila ka mga pangalan matapos malab-ot ang ila ginpatuman nga limitasyon.
Ginpahayag ni Gatchalian nga indi halin sa DSWD ang orihinal nga mga listahan nga gin-gamit sa pagpanagtag sang ayuda.
Apang ang ahensya amu ang nag-atubang sa mga reklamo sang mga driver sang nagproblema ang payout.
Bangud sini, nagpatigayon ang DSWD sang validation kag konsultasyon sa nagkalain-lain nga transport groups tubtob nga nakahimo sila sang listahan nga nagalakip sang ginabulubanta 1.8 million ka driver halin sa nagkalain-lain nga transport modalities, luwas sa non-motorized transport.
Ini na ang ginasiling nga una kag komprehensibo nga listahan sang mga driver sa pungsod nga mahimo gamiton kag regular nga i-update agud mas mapadasig kag mangin mas maayo ang pagpanagtag sang ayuda sa masunod nga mga programa.
Suno sa DSWD, nakig-angut na man ang ahensya sa Department of Transportation ukon DOTr agud makahimo sang mekanismo para sa regular nga pag-update sang database sang mga driver.
Nagpangayo naman sang pasaylo ang ahensya sa mga driver nga posible nga wala gihapon nalakip sa listahan.
Gin-ako man sang DSWD nga indi naging perpekto ang proseso sang pagpanagtag sang ayuda, kag kinahanglan pa ini nga pauswagon agud masiguro nga ang mga kwalipikado nga benepisyaryo indi malipatan sa masunod nga mga programa.
