Ginhingyo sang kampo ni Former President Rodrigo Duterte sa International Criminal Court (ICC) nga kakason ang tatlo ka bag-o nga legal representatives sang mga biktima sang war on drugs bangud sa ginaalegar conflict of interest.
Sa 11 ka pahina nga mosyon nga gin-file sang Pebrero 11, ginhingyo sang abogado ni Duterte nga si Nicholas Kaufman sa Pre-Trial Chamber I nga i-revoke ang appointment nanday Joel Butuyan, Gilbert Andres, kag Nicolene Arcaina bilang Common Legal Representatives sang mga biktima, bangud gina-alegar bias ang mga ini.
Suno sa depensa, isa sa mga abogado ang gina-alegar nagpakamalaut sa ila legal nga estratehiya sa media kag nagpabutyag sang nauna nga panan-awan nahanungod sa akusado batuk sa anay Presidente.
Ginsambit man nga si Arcaina ang anay staff lawyer sang CenterLaw Philippines, sa diin madugay na nga konektado sanday Butuyan kag Andres, nga suno sa depensa posible nagapakita sang pagpadayon sang isa ka propesyonal nga relasyon nga indi nagasanto sa integridad sang hearing.
Naghingyo man sang kampo nga i-suspend ang pag-access sang mga deputies sa case records agud mapunggan ang posible nga pag-uyat sang mga materyales nga mahimo makahilway kay Duterte.
Ginsuhestyon sang depensa nga ang Office of Public Counsel for Victims lamang ang mag-asikaso sang interes sang mga biktima agud malikawan ang atraso para sa confirmation of charges hearing.
