Ginpakamalaut sang kampo ni Vice President Sara Duterte ang presentasyon sa House Committee on Justice angot sa ginaalegar inciting to sedition kag grave threats nga kaso nga suno sa ila nagapakita sang kakulang sang ebidensya batok sa bise presidente.
Suno kay Atty. Paul Lawrence Lim, ang pila ka ebidensya ginaalegar nga “gin-curate” kag “gin-splice”, samtang ang husto nga konteksto wala ginkonsiderar kag ang matuod nga data gin-islan sang mga opinyon.
Suno sa depensa, indi ini bastante sa pagporma sang basehan sang posible nga kabangdanan, ilabi na ang isa ka prima facie nga kaso nga may “reasonable certainty of conviction,” kag nagsiling sila nga ang alegasyon indi mapamatud-an paagi sa pagsulit lamang sang konklusyon.
Ginkwestyon man sang kampo ang ginaalegar pagtinguha nga i-angot ang bise presidente sa mga pahayag batok sa Presidente, nga suno sa ila kulang ang ebidensya kag nagalab-ot sa espekulasyon lamang.
Dugang pa ni Lim nga kaangay sang “fishing expedition” ang mga hearing agud nga daw kaangay may basehan ang mga reklamo sa impeachment, kag nagpanindugan nga dapat resolbahon ang mga isyu sa nagakaigo nga forum kun sa diin mahimo nga ma-review ang mga ebidensya suno sa rule of law.
