Kampo ni VP Sara, wala sang nakit-an nga isyu sa pagbalik sang “green box” tax records sa BIR

Wala sang nakit-an nga isyu ang kampo ni Vice President Sara Duterte sa ginpatuman nga pagbalik sang “green box” nga nagalakip sang tax records sang bise presidente kag sang iya bana nga si Atty. Manases Carpio sa Bureau of Internal Revenue ukon BIR.

Ini matapos nga ginmandu ni Senate Impeachment Trial Presiding Officer Francis “Chiz” Escudero ang pagbalik sang nasambit nga sealed box sa BIR sa tion sang impeachment trial.

Suno sa legal counsel ni VP Sara nga si Atty. Michael Poa, wala nila ginakabig nga daku nga development ang ginpatuman nga pagbalik sang kahon.

Dugang pa ni Poa, wala sila sang may nakita nga isyu sa nasambit nga tikang kag padayon ang ila pag-atubang sa nagapadayon nga impeachment proceedings.