Kapin sa 160 ka mga tawo ang missing pa matapos ang isa ka semana nga makahalalit nga pagbaha sa Texas, USA, sang Hulyo 4, nga nagpatay sa 109 ka mga tawo.
Nagpaandam si Texas Governor Greg Abbott nga mahimo magtaas ang numero sang mga missing samtang nagapadayon ang pagpangita.
Sa Kerr County lamang, ginreport ni Gov. Abbott nga 161 ka tawo ang ginreport nga nadula sang mga abyan, himata kag mga kaingod.
Sa nasambit man nga county nga kabahin sang sentral nga rehiyon sang Texas nga kilala bilang “flash flood alley” amo ang pinakagrabe nga nahalitan sang baha nga nagbilin sang 94 ka mga kaswalti, lakip ang 27 ka mga dalagita kag mga counselors nga yara sa isa ka Christian youth summer camp sang nagbulwak ang Guadalupe River malapit sa kampo kag nagtuga sang grabe nga pagbaha sa lugar.
Lima ka mga youth campers kag isa ka counselors, subong man ang isa pa ka bata nga indi kabahin sang summer camp, ang nadula tubtob sang Martes sang gab-i, oras sang Estados Unidos.
Ang nagapadayon nga mga operasyon sa pagpangita kag pagluwas nagaatubang karon sang isa ka daku nga hangkat bangud sang wala untat nga pagbaha kag lunang sa mga county nga nahalitan sang daku sang kalamidad.
