ROXAS CITY – Naalarma ang tag-iya sang isa ka apartment sa Barangay Tiza, Roxas City matapos nasapwan ang pila ka mga container sang mga kemikal sang ginaalegar ginagamit sa paghimo sang shabu sa isa ka bakante nga lote.
Sa exclusive interview sang Bombo Radyo Roxas kay Mr. Crispin Tambal, ginpahayag sini nga nagsugid ang iya caretaker nga nakakita sang mga kemikal nga ginbilin sa bakante nga lote nga tupad sang ginarentahan nga apartment ni Russel Dichosa sang banwa sang Pontevedra.
Suno kay Tambal nagarenta si Dichosa sa nasambit nga apartment sang bulan sang Nobyembre sa diin nakilala ini nga isa ka kontratista sang mga kemikal nga ginagamit sa mga school laboratory.
Apang madugay na nga panahon nga wala ini nakapakita gani agud indi kanugon ang apartment kag maparentahan ini sa iban, nagpangayo sang pahanugot ang tag-iya sa mga barangay officials para mabuksan ini.
Nag-abot man ang mga pulis nga gintawagan sang mga opisyales sang barangay nga gilayon nagpatigayon sang inspeksyon sa balay.
Ginkumpirma naman sang caretaker ni Tambal nga ginaupod siya ni Dichosa sa mga transaksyon sini sa mga eskwelahan kag kun kaisa ginahatagan sang kuwarta bilang bayad sa iya nga trabaho.
