Kita sang pila ka mga tricycle driver sa Roxas City, apektado na sa padayon nga pagsaka sang presyo sang gatong

Apektado na ang kita sang pila ka tricycle driver sa Roxas City bangud sa padayon nga pagsaka sang presyo sang gatong.

Sa interview sang Bombo Radyo kay Narciso Teodore, isa ka tricycle driver, iya ginpahayag nga nagnubo ang iya kita kag yara na lamang sa indi maglab-ot sa P500 kada adlaw.

Suno kay Teodore, haslos sa P100 ang kada litro ang presyo sang gatong, gani daku ang epekto sini sa ila pagbyahe kag kita.

Dugang pa sini, apisar sang pagnubo sang presyo sang gatong sang nagligad nga semana, wala niya ini masyado nabatyagan bangud sentimos lamang ang gina-rollback sa presyo.

Matandaan nga sang Martes, Setyembre 8, nagtaas ang presyo sang gatong nga naglab-ot sa P5 kada litro.