Mas madamo nga suplay sang kuryente kag ang posibilidad sang mas mamag-an sa bulsa nga balayran sa kuryente ang ginapaabot nga mga benepisyo sang 20 MW / 40 MWh Panitan Energy Storage Project (Phase 1) nga bag-o lang natukod sa Panitan BESS Site sa Brgy. Timpas, banwa sang Panitan.
Ini nga proyekto ang ginpanag-iyahan sang EcoSolar Energy Corporation.
Suno kay EcoSolar Energy Corporation President, Francisco G. Delfin Jr. sa ginpatigayon nga Mechanical Completion Ceremony sang Hulyo 23, 2026 sa pareho nga barangay, ang Panitan Energy Storage Project, nga ginakonsidera nga labing una nga Battery Energy Storage System (BESS) sa bug-os nga probinsya sang Capiz, yara na sa mechanical completion.
Ini nagakahulugan nga handa na ang BESS nga mangin isa ka tagareserba sang enerhiya nga makabulig sa pagpahagan-hagan sang power outage ukon brownout, pagresulba sa magatuhaw nga problema sa power grid, kag magahatag sang malawig nga resulta sa pagpanubo sang presyo sang kuryente sa maabot nga mga tinuig.
Ang nasambit nga proyekto mangin kabahin man sang mas daku pagid nga plano para sa renewable energy pinaagi sa ginaplano nga 90 MW Panitan Solar Power Project, ang labing una man nga utility-scale solar power project sa probinsya.
Nangin posible ang pagdala sang sini nga pamuhunan sa Capiz sa pagpanguna sang Gobyerno Probinsyal sa idalum sang liderato ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼, pinaagi sa Provincial Economic Development and Investment Promotion Office (PEDIPO) nga ginapamunuan ni PEDIPO Head Rio Garcia nga nag-endorso sang proyekto sa Sangguniang Panlalawigan sang Capiz, sa LGU Panitan, sa National Grid Corporation of the Philippines (NGCP), kag nagkalain-lain nga ahensya sang Gobyerno para sa madinalag-on kag hapsay nga pagpatuman sang proyekto sa probinsya.
Yara sa nasambit nga seremonya ang mga katapo sang EcoSolar Energy Corporation kag PetroGreen Energy Corporation, NGCP, Capiz Electric Cooperative Inc., Department of Enegy (DOE) Undersecretary Mario C. Marasigan, Vice Governor James Magbanua, Panitan Mayor Katherine Dequiña-Belo, mga miyembro sang Sangguniang Bayan sa pagpanguna ni Vice Mayor Atty. Audie Advincula, kag ang lokal nga pamunuan sang Brgy. Timpas sa pagpanguna ni Kapitan Teody Degones.
