Arestado ang isa ka lalaki matapos makuhaan sang illegal nga droga kag armas luthang sa Barangay Viscaya, President Roxas, Capiz.
Ang arestado amo si alyas “kiboy” 37-anyos, residente sang Viscaya Ville sang nasambit nga barangay.
Sa interview sang Bombo Radyo kay Police Captain Joebert Delos Reyes, Officer-in-Charge sang President Roxas Municipal Police Station, iya ginpahayag nga nakabaton sila sang report gikan sa isa ka pumuluyo parte sa isa ka tawo nga makaduda ang lihok.
Suno kay Delos Reyes, gilayon sila nagresponde sa lugar kag sang ila ginberipikar ang report, ila nadakop ang suspek kag nakuha sa iya paghinakop ang isa ka indi lisensyado nga armas-luthang.
Dugang pa sang natungdan, magluwaas sa armas luthang na-recover man sa suject person ang duha ka sachet sang suspected shabu.
Sa subong, preso na ini sa President Roxas Municipal Police Station, kag magapangatubang sa kaso nga paglapas sang Republic act. 10591, ukon comprehensive firearms and ammunition act kag Republic act 9165 ukon comprehensive dangerous drugs act of 2002.
