MAAYON CAPIZ – Dakop ang isa ka lalaki, matapos ma-implementaran sang duha ka separado nga search warrant sa Barangay Cabungahan, Maayon, Capiz.
Ginkilala ang nadakpan kay alyas “Russel”, yara sa legal nga pang-edaron kag residente sang nasambit nga lugar.
Sa impormasyon nga nakuha sang Bombo Radyo nagikan sa Maayon Municipal Police Station, ginapahayag nga kaso nga paglapas sa RA 10591 ukon Comprehensive Law on Firearms and Ammunition kag R.A 9516 ukon Illegal Possession of Explosives ang paga-atubangon sang nadakpan.
Natigayon nga madakpan si alyas “Russel”, pinaagi sa gintingub nga pwersa sang Capiz PPO-PIU, Capiz Tracker Team, CIDG Capiz, kag Maayon MPS.
Ang search warrant ang ginpapanaog kag ginpirmahan ni Hon Lorencito B. Diaz, Executive Judge sang RTC 6, Branch 17, Roxas City, Capiz napetsahan Enero 8, 2025.
Mahibaluan nga nakuha sa posesyon sini ang 1 ka unit sang .38 revolver nga armas luthang, 5 ka bala, 1 ka sling bag nagaduag itom, 1 ka ginapahayag Fragmentation hand grenade kag 1 ka improvised box sang ginapatihan granada.
Sa karun, nagapabilin ang nadakpan sa kustodiya sang Maayon MPS para sa nagakaigo nga disposisyon.
