Sa adlaw-adlaw natun nga pagpangabuhi, kanami lamang paminsaron nga may mga tawo nga nagaulikid para sa aton.
Apang, paano mo masiling nga may limitasyon ang pag-ulikid sa imo isigkapareho?
Kasubong na lamang sang natabo sa Shizuoka Prefecture sa Japan, ginapahayag isa ka babayi ang nag-report sa mga otoridad bangud ginsulod sang 50-anyos nga kasilingan nga lalaki ang iya sini apartment nga wala man lang naglisensya kag ginlabhan pa suno diri sang nasambit nga lalaki ang iya sini mga bra kag panties.
Kun sa imu ini natabo, mapasalamat ka ayhan bangud sa ginhimo sini nga inisyatibo sang lalaki ukon maakig ka bangud isa ini sa mga pribado nga aspeto nga dapat ikaw lang ang nagahimo?
Bangud sa natabo, ginreklamo gilayon sang babayi ang kasilingan nga lalaki kag gin-aresto ini sang mga otoridad.
Sa karon, ginahibalo pa sang mga otoridad ang motibo sang lalaki bangud wala man ini sang may ginkawat nga kun ano man nga butang sa apartment kundi ginpanglabhan lamang sini ang mga bra kag panty sang babayi.
Ang pamangkot sa karon, matuod ayhan nga nagaulikid lang ang nasambit nga lalaki ukon may iban pa ini nga tinutuyo magluwas sa paglaba sang nasambit nga mga bra kag underwear?
